謝霆鋒前日再次發生交通意外，更因而受傷要送入深切治療部留醫，雖然他昨日已出院，但霆鋒一班圈中好友對他的情況都十分關心，並希望他能早日康復。
陳奕迅： 霆鋒唔係撞親個腦咩？我見佢要入深切治療部，重以為佢好嚴重㖭，我上次整親都要留醫成個禮拜啦。我會鬧佢，叫佢以後都唔好揸車，或者叫佢請我做佢司機啦。
容祖兒： 希望佢爭取時間休息啦，始終身體要緊，不過佢飛得應該都冇乜事啦。
林嘉欣： 我知霆鋒撞車，但冇打電話畀佢，因為都知道好混亂，我唔會勸佢唔好揸車，我又唔係佢邊個，不過做朋友都會關心佢。我就唔會坐佢車，安全第一嘛。
何韻詩： 我不嬲都唔開快車，我都好少坐霆鋒車，試過一次坐朋友車跟住霆鋒，佢都開得OK。男仔好鍾意刺激，希望霆鋒小心啲，都係一句講晒，揸車要小心啲，發生意外就唔好。
鄭伊健： 我唔知霆鋒撞車嘅情況，冇得叫佢小心揸車，其實呢啲嘢冇得叫，或者等我諗吓用第二種方法。
周英杰： 霆鋒其實唔係咁大件事，入深切治療部都係轉房啫！
梁詠琪： 我聽新聞知霆鋒撞車，但唔清楚情況，唔知佢傷成點，意外邊個都唔想，希望佢可以快啲好番，大家唔好畀壓力佢。可能霆鋒壓力大唔小心，我又唔清楚佢揸車嘅習慣，其實都要安全啲，佢重有大把前途，要安全第一。