回歸五年製造了滿城負資產，許多人身家在瞬間暴跌一半，然後一殼眼淚，自怨自艾。資產暴跌不一定是這樣過日子的，當Joi和太太Janey發覺他們的物業縮水數十萬之後，只苦笑了一場：「唔見幾十萬，當交學費都未夠啦！」
劉迺賢（Joi）和劉太（Janey）於九七年樓市高峯期，花了大筆積蓄買下一個二手樓單位，金融風暴就在這時刮起，一、兩年間，單位市值由一百二十萬元急跌至七十萬元。他們還以為單位可以保值，一心買來以備將來不時之需，現在惟有出租他人，待兒女長大後給他們安身之所。
這一遭可以是一殼眼淚，但他們只是相對苦笑，Joi說：「呢個唔係怨嘅時候，日日嗌好慘、自怨自艾都冇用。就算今日搵唔到，咪當係磨練囉。成日活喺怨氣當中，你會好難翻身，甚至令身邊嘅朋友都一齊同你唔開心。我覺得我哋呢代細個冇乜點捱過苦，𠵱家應該捱吓，唔見幾十萬，當交學費都未夠啦。」
Joi本來在漫畫出版社玉皇朝任職助理，九八年傳銷業興起，他在朋友介紹下投入這片尋金熱，高峯期每月可賺三、四萬元，又開舖賣水晶，可惜經濟每下愈況，生意做得半年就打回原形。目前他自立門戶，為一些公司做設計及繪圖，生意只能打個和：「以前個客畀得錢少，我會唔接個job，𠵱家唔敢，反而希望個客可以帶到一啲新客源畀我，密食當三番囉。」
Janey是美容院老闆，「九一一」後，她聽從拍檔建議，減薪節流，削減員工花紅，翌日即時有兩名員工辭職，導致美容院有客預約都不夠人手。這個故事教訓她做人切忌杞人憂天，自找麻煩。現在Janey面對逆境有另一種看法：「呢個時間反而要衝，守得太耐會死。𠵱家前景好似好灰，但係我哋要嘗試豁出去，可能跳出死胡同之外，會見到一道彩虹。」