林曉峰嘅家姐林珊珊、鄭伊健、陳法蓉、章小蕙、名模Rosemary同蔣怡等，前晚去咗灣仔會展睇新片《未來報告》嘅首映。
對於有傳林曉峰同拍拖十年嘅潘菁華分手，係因為第三者康子妮，潘菁華日前重喺訪問度大罵二人係「狗男女」，林珊珊表示原來細佬林曉峰同康子妮拍拖前，佢哋屋企都開咗家庭會議，林珊珊話：「我哋好早之前開過家庭會議，佢（林曉峰）選擇邊個父母一早知，所以對於有任何新聞出街都唔會驚訝。以心為心，我都知佢（潘菁華）好唔開心，我同佢都好熟，不過，我已同佢冇聯絡。」
而章小蕙就表示，如果有時間，佢都會出席修身堂尖沙嘴分店今日嘅開幕典禮，佢話：「我就算去唔到都會送花籃，我同張玉珊係好朋友，冇理由限死要佢搵我做代言人。」章小蕙重話前夫鍾鎮濤安排咗一對仔女，暑假去北京入夏令營。
名模Rosemary前晚同媽咪Julie，出席灣仔會展睇新片《未來報告》嘅首映禮。
問佢點解唔同男友Gordan一齊嚟，佢話男友要睇世界盃，所以就搵媽咪作伴。Rosemary又話：「我𠵱家自己住，有時都會煮吓嘢食，Gordan都會上嚟，但佢唔會過夜，我係唔會同居嘅。」
關之琳噚日以電影《絕世好B》演員身份，出席香港大球場慈善足球明星賽。佢話男友黃家諾鍾意睇波，所以佢都有留意世界盃戰情。關之琳重透露簽咗內地經理人，專幫佢接內地廣告，佢話：「我喺香港幾年先拍兩、三部戲，同埋《大碗》喺內地好受歡迎，多咗人搵我拍廣告。」
古天樂噚日喺政府大球場為《絕世好B》做宣傳，古仔話月中會同張栢芝去上海拍新戲《河東獅吼》，套戲入面有好多騎馬戲份。古仔細過時因為俾馬踩過而有陰影，到𠵱家重好驚馬，所以佢要求導演所有騎馬戲都要用替身。
盧巧音前男友余文樂噚日去咗奧海城，出席新城娛樂台嘅《萬人共賞世界盃狂熱——決戰篇》，有消息指盧巧音失戀冇耐就同梅艷芳愛徒彭敬慈拍拖，余文樂對於舊愛嘅緋聞，酸溜溜話：「我之前都未聽過佢提呢個人（彭敬慈），佢（盧巧音）有自由，我控制唔到。」
洪天明媽咪係韓國人，前晚佢喺灣仔會展睇新片《未來報告》嘅首映時，對於當晚南韓以二比三輸咗畀土耳其嘅世界盃賽事，都有啲唔開心。
洪天明話：「我都唔開心㗎，好失望。我覺得南韓太快失波，其實南韓都打得好好，只係個旁證做得唔好。」