真係唔明土耳其人點諗！佢哋隊波贏咗南韓攞到今屆季軍，已經係一大突破，估唔到賽後國內傳媒同球迷普遍唔係太高興，好多人重話贏唔到冠軍好失望。喂，知足啲好喎。
據報話土耳其傳媒呢一兩日重不斷為輸畀巴西哭波喪，話國家隊根本有能力攞冠軍獎盃返歸。問十個球迷九個都話贏唔到冠軍好失望，真係唔知咩世界。唔使講乜嘢，淨係講土耳其冒起不過幾年；而今屆賽前，佢哋只不過排世界二十幾，你話隊波好多球星咩？賽前鬼有人識伊利安同魯斯度咩？
換轉係第二隊同級球隊攞到季軍，肯定燒晒炮仗慶祝，估唔到佢哋國家咁自大。我求大俠呢次真係睇唔過眼：老友，你估世界盃咁易贏咩！
噚日巴西同德國火併之前，無份踢決賽周，幾乎發咗霉嘅拜仁前鋒艾巴，失驚無神宣布唔再踢國家隊，慌死無人記得佢咁，擺明博見報啦。咪話我求大俠睇小佢，巴西前鋒人才濟濟，佢踢唔踢國家隊根本無關痛癢。
噚日賽前全世界大部份人都落注買巴西，所以賭波公司當然唔想巴西贏。唯一唱反調係德國賭波公司，其中一間公司嘅發言人承認好多德國人寧願捧一捧自己國家，同時又押重注高路斯攞金靴獎，如果是但開一瓣佢公司都輸死，所以希望德國同高路斯雙輸，終於俾佢哋恨到啦！
曼聯近年夏天總有一兩單球員大交易，不過今年傳聞特別多。繼列斯嘅李奧費迪南後，最新傳聞係領隊費爵爺想買埋巴西國腳卡洛斯，兩個都係高價貨。曼聯有錢啫，都唔會比費爵爺亂嚟啩？不過站響曼聯球迷立場，當然希望碧咸同卡洛斯兩個罰球王一齊在陣啦。
響南韓對意大利場波做旁證嘅匈牙利人施斯基利，日前爆料話托迪根本無插水，被逐好無辜；佢重話已經㩒晒掣向球證摩蘭奴示意，只係後者唔理佢而已。江湖傳聞話摩蘭奴俾黑手黨追殺，睇嚟施斯基利有心將個鑊卸晒畀摩蘭奴，明哲保身真聰明喎。