六月二十七日，所有報紙嘅新聞都有講及十大公營機構行政總裁嘅薪水，個個都講任志剛成為削薪焦點。呢單新聞喺早一日（六月二十六日）已經喺三份報紙搶先報道，食咗頭啖湯，點解佢哋咁醒呢，其他報紙唔通瞓晒覺？呢日碰到電子傳媒總編輯A，問佢對呢段新聞有何見解，點知佢連粗口都出埋，好少見佢咁火爆喎，因乜事？
編輯A話：「超，六月二十五號，曾蔭權司長叫齊六間電台電視台、報紙採訪阿頭去做吹風會，講公營機構薪酬，曾司長再三叮囑，單新聞唔好爆，只係畀大家一個背景，到政府宣佈時，多啲了解啫。散會前，佢再講多一次，請各傳媒唔好提前爆料，否則以後再唔搞呢類簡報。我哋守晒規矩，如果要爆嘅話，電台電視喺晚上六時就講晒出嚟啦，幾時輪到報紙爆先！好多報紙都守諾言，估唔到有人玩嘢，搶早一日報道，以後大家唔使遵守遊戲規則啦！」
聽完A編輯咁講，再同大記者仄吓，大記者亦媽媽聲咁話：「曾司長新聞秘書朱曼玲喺六月二十五號晚重周圍打電話畀我哋，拜託我哋守規矩、守諾言。點鬼知有人唔聽話啫，以後朱小姐打電話嚟，重使唔使聽呀。」唉，現在傳媒競爭激烈，以前啲簡報會規矩，大概係out咯。朱曼玲俾人玩咗一鋪，重唔怕怕，以後重敢制咩！