巴西對德國嘅世界盃決賽，門票當然成為搶手貨，噚日喺橫濱嘅比賽場館外，就有好多買唔到飛嘅球迷，四圍搵黃牛黨買飛；不過就算球迷出價至萬一蚊港紙，都買唔到原價三千九嘅二等飛。因為決賽門票實在太矜貴，所以黃牛黨多會睇見銀紙先開價，好似小記呢類冇心買搞搞震嘅人，同佢問價就真係睬你都傻。
日本群馬縣係出名多巴西籍日裔居民住嘅地方，而當地餐館為咗今次世界盃決賽，專登安裝大型電視吸引顧客。而東京涉谷一間以巴西食品為主嘅餐廳，因為重點宣傳有電視直播，所以入面一百八十個座位，兩日前已經俾顧客訂到全院滿座。
橫濱球場外面，大批巴西球迷攞住國家隊波衫發售，希望睇波之餘，重可以賺少少錢幫補經費。雖然嗰啲全部係翻版波衫，而每件亦賣到一百蚊港紙；不過，由於實在太多球迷仰慕森巴足球，所以呢班「翻版商」仍然可以大賺一筆。
巴西噚日捧世界盃時，除咗出現巴西球員高興、德國球員感人嘅情景，原來橫濱球場上空，大會事先安排咗二百幾萬隻紙鶴空降球場，場面夠晒壯觀；場內所有球迷爭相搶奪不特止，連大會工作人員、記者、保安人員都搶埋一份。
德巴的世紀之戰肯定全球矚目，據一間瑞士電視台估計，全球將有十五億人觀看電視直播，打破電視史上最多觀眾收看的紀錄，而今屆世界盃共六十四場比賽，估計有超過四十億人次收看。
巴西前鋒朗拿度於決賽穿上嘅波boot原來大有來頭，全銀色鞋身固然搶眼，而成對鞋只有十五個組件，比一般波boot少一半，所以只重一百九十六克，比起格連在悉尼奧運所着嘅跑鞋重輕兩克，成為世界最輕嘅運動鞋。