大家好，我係好姨薛家燕，由今日開始一連五日，我將會喺呢個「星級教室」度，同大家分享一吓我多年嘅煲湯心得。
噚日巴西同德國爭世界盃冠軍，我個仔都有捧佢鍾意嗰隊巴西，佢成晚喺屋企緊張到又叫又嗌，結果搞到把聲沙晒，我做人阿媽嘅，見到佢咁樣梗係心痛啦！
好彩我平日因為要唱歌，都會煲番啲對把聲有保養功效嘅湯水飲吓，呢個「壯氣固津湯」，又可以叫做「唱K長氣湯」，除咗可以滋潤肝腎，補益脾胃同防止聲沙之外，唱歌唔夠氣，飲呢個湯都好有效用。雖然呢個係藥材湯，但就補而不燥，大家可以放心飲用。正所謂飲咗壯氣固津湯，唱K可以唱天光。
（五之一）
沙參三錢、黨參五錢、淮山五錢、海竹片四錢、烏雞一隻、瘦肉四両、紅棗六粒、生薑三片。
採訪：戴彩煥
攝影：陳慧安
顧問：何國璋中醫師