今期熱門話題當然係MMS，唔單止有部支援MMS的新手機上場，網絡商亦順勢推出新服務，Orange就宣布無論發送MMS、下載罐頭或動畫MMS都會逐個計逐個收費，唔使分數據用量另外再加內容來計算收費，Send幾多個就畀幾多錢，非常方便易計數。
記者、攝影：招佩珊
用MMS服務要先畀$9月費，之後每發送1個MMS就收$3，好似用部7650影完相之後加埋字Send出去就畀$3，不過每個訊息唔可以多過100KB。
Orange提供超過70款卡通人物及動畫MMS，以及明星同球星相片，用家可經WAP下載到手機，然後再轉送畀朋友，例如下載Twins呢張相就收$3。
HelloKitty係其中一款卡通MMS，每個MMS由6幅圖片組成兼且輪住出現，睇訊息時就好似睇緊動畫，不過下載Sanrio公仔MMS比較貴，每次收$10。
若然對方Send個MMS畀你，但自己用的並非MMS手機，你都會收到個SMS提示，然後可以喺Orange網頁內睇番個訊息的內容。
用手機所拍攝的相片唔單止可以傳送及儲存在網頁內的「我的相簿」，而且亦可利用網頁內的印相服務Print相，然後喺預先選擇的沖曬店攞相。