本報體育版真抵死，形容鬈毛的朗拿甸奴似《星戰前傳》的渣渣兵，有相對證，球迷笑到嘔泡。接着又用照片對比法，將巴西後衞盧斯奧比作蠟筆小新，指南韓門將李雲在似《我老婆係大佬》的男主角。
世界盃效應下，董特首亦有意踢部長盃。剛紮職的工商科技局長唐英年面口超長，樣子更似渣渣兵。唐少有冇朗拿甸奴的金Q右腳？抑或一落場晒靴便食紅牌？渣渣兵只識打星戰，唐局長一邊啖紅酒一邊搞科技，好易飲大，搞出科技戰。科網爆破已經累到香港五窮六絕，再打科技戰，渣拿都無埋，等於提早向冥王星報到。
董特首鍾意南韓隊，似南韓教練的卻是梁錦松。軒迪克被球迷視為英雄，年紀做得孫女的女球迷自願以身相許，球迷一致推許他當南韓總統。軒迪克對讚頌照單全收，確係老實唔客氣。特區財爺對角逐未來特首的說法沒有sayno，幾年後，說不定跟軒迪克一齊上位。軒迪克女球迷雖多，財爺只得一個國寶fan，但貼身指導教佢點插水博十二碼，食力睇高一線。
至於董特首本人，自視為班主，很快會學佩魯賈球會那位黑手黨主席，公開發難，警告那些在未來五年內，一手摧毀他的黃金入球的人，即場炒魷兼搵殺手買起！睇睇團隊有邊位似安貞煥？被女記者讚靚仔的梁振英留長一把鬈髮，有幾近磅呢？