由一間國際著名大酒店的總廚做到一間本地酒家的點心部主管，由三、四萬元月薪回落到萬多元，胡建民體會到做人如做菜，山珍海味固然要盡心烹調，就算是鹹魚青菜，也要做得好好睇睇。
四十三歲的胡建民走紅於「阿二靚湯」，一九八五年，大家樂集團收購了「阿二靚湯」之後，分店由四間擴充至十五間，聘用胡建民做行政總廚，月入數萬元：「嗰時香港經濟暢旺，飲食業一片光明，一碟小菜要三十蚊，事隔十幾年，𠵱家一碟小菜一樣係三十蚊。」
九七交接期間，胡建民身在印尼泗水的香格里拉酒店當行政總廚，那時他根本沒有想過回流：「我其實唔想返嚟香港，覺得呢度同以前唔同，以前好多貿易，外國人入大陸做生意一定要經香港，近幾年工廠北移，成日都有人失業，擔心經濟唔會好得幾耐。」但九八年因為家人問題，不得已一定要返港。
「九八年返嚟，坐喺屋企半年都搵唔到嘢做，一來係難搵咗，二來搵開咁多錢，一時間接受唔到咁少人工。」幸好其間印尼雅加達香格里拉向他招手，卻又好景不常，去年九一一事件後，酒店大裁員，四百名被炒的員工日日坐在酒店門前示威，酒店生意大受影響，胡建民明知香港市道艱難，也要硬着頭皮回來找工作。
回港後找到一份酒樓點心部主管的工作，月薪比較在印尼的時候，少了一半，但他沒有氣餒：「做人要睇得通，每個人運氣有好有壞，最緊要肯搏肯拼。好多行家寧願日日坐喺屋企，我有時都會鬧佢哋，你唔食，你老婆仔女都要食㗎！一個好廚師，鮑魚燕窩固然要整得好食，一條青菜都要做得好好睇睇。做人一樣，回歸前好景當然可以好好咁生活，回歸後經濟差咗，一樣要好好地生活，肯做唔會冇嘢做。」