暑假就快到，唔少卡通片都乘勢喺電視播放，好似呢套可愛到震嘅《哈姆太郎》。憑住呢班可愛小倉鼠，喺日本已經成為小朋友、女孩子新寵，電視、電影以至舞台劇都大把人捧場，個勢拍得住當年比卡超咁巴閉。卡通片喺香港啱啱上映，一批可愛玩具亦剛剛到埗，主打幾個小朋友一齊玩，增加彼此溝通機會。
記者：張穎倫
攝影：黃子偉、陳智良
ImageKids：張朗芝、仇峻昉
同主人小露感情要好嘅黃金倉鼠哈姆太郎，一齊搬到新環境居住，喺嗰度哈姆太郎認識咗大將率領之下嘅其他倉鼠，大家一齊四出冒險，更發生不少趣事。由於呢班為數15隻嘅可愛倉鼠，個個身懷不同絕技，因而可以暗中為佢哋嘅主人解決問題。想睇吓佢哋係咪咁犀利，就要留意逢星期一、三、五，下午五時五十五分喺翡翠台播映嘅《哈姆太郎》啦！
玩法：小朋友可以任揀女主角絲絲或者哈姆太郎，一人用一邊鬥撞PatPat，邊個畀人撞到瞓低就算輸。
評語：迫爆倉鼠屋可以畀幾個小朋友一齊玩，不過如果得兩個人玩的話，小記就推介呢個撞PatPat玩具，兩隻倉鼠撞PatPat嘅時候抵死到暈！
玩法：平時佢靜靜哋唔願郁，不過每當你拍手又或同佢傾偈，佢就會行嚟行去或者轉嚟轉去同你玩。
評語：最大好處係一個人都玩得，動作儍吓儍吓，非常得意，十足十真嘅哈姆太郎同你玩緊一樣。
玩法：最啱一大班朋友齊齊玩嘅倉鼠驚魂塔，玩法同一般驚魂塔一樣。每人輪流將倉鼠放上去，睇吓邊個唔好平衡力，唔小心將倉鼠，甚至整座驚魂塔塌翻就算輸。
評語：玩嘅時候真係一步一驚心，每放一隻倉鼠就感覺到佢哋搖吓搖吓，刺激又得意。
玩法：小朋友輪流將海綿製造嘅哈姆太郎塞入倉鼠屋，每人塞一隻，直至迫爆倉鼠屋，最後塞唔入嘅小朋友就係輸嘅一方。
評語：玩法雖然簡單，不過睇住海綿倉鼠塞到變晒形，過程極之搞笑，最重要係小朋友可以一齊討論塞倉鼠嘅方法，考心思之餘，更能增加彼此的溝通。
玩法：小朋友想考考反應同策略的話，呢套棋盤遊戲就絕對抵玩，一套底面共8款嘅棋盤，總共可以變化出12款不同遊戲，全部都係改良自蘋果棋、波子棋、飛行棋、蛇仔棋以及麻雀等不同遊戲。
評語：雖然都係舊酒新瓶，但換上可愛嘅哈姆太郎同其他倉鼠作為棋子，絕對吸引小朋友，而且玩法夠多，佢哋又豈能抵擋。
玩法：一次過有13位倉鼠一族任你掟，每隻倉鼠都代表不同的分數，小朋友可自訂回合數目，然後計算誰人掟得最高分。
評語：玩法同大人嘅掟飛標差唔多，但就絕對安全，加上倉鼠圖案由主角哈姆太郎、靚女絲絲到最貪睡嘅矇矇都有，掟嘅時候特別開心。
除咗有晒哈姆太郎嘅最新消息、電影、精品，以至舞台劇介紹之外，更有得同哈姆太郎玩包剪揼及行街街等網上遊戲。
網址：
SOGO(28338338)
銅鑼灣軒尼斯道555號
吉之島(24527333)
屯門屯順街一號屯門市廣場一期地面高層
(c)R.KAWAI/Shogakukan,SMDE,TVTokyo2000LicensedbyAnimationInt'l