入行四年，阿Ann共拍過九部劇集，估計目前月入約三萬元，但現年二十七歲的她卻非常富貴，竟然有能力於去年底購入價值五百多萬元、連花園面積達三千呎的匡湖居獨立屋，不過阿Ann解釋其實她要孭樓債，供樓供足二十年，而家人位於溫哥華的洋房也要賣掉，套現來「樓換樓」。
阿Ann說：「層樓係我嗲哋媽咪畀首期㗎，我自己就畀咗六位數字，之後我就負責供囉，我又唔係俾人包，又唔係要靠邊個養，我靠自己搵錢供樓，好正常呀。我𠵱家都要租屋住㗎，供樓就當交租，但有間屋會畀自己更大推動力去賺錢，以前我都將拍廣告啲錢儲起晒，所以至有些少錢幫手畀首期。」
其新居仍在裝修中，但阿Ann所有事都一腳踢，她笑說：「將來我亦冇打算請工人，而且裝修嘅嘢唔會太華麗，舒服得㗎啦。」目前阿Ann租住的地方，曾有傳是月租三萬元的銀線灣洋房，故她一直被人質疑收入與支出不相稱，對此她說：「我租嘅地方唔係三萬蚊，係萬零蚊。」租屋要萬多元，供樓亦至少要萬多元，那豈非她每月的收入都要奉獻給住屋？阿Ann卻稱沒有入不敷支，她說：「我唔知點講，總之我夠使啦，我唔會瘋狂買嘢，又唔使要好名牌嘅，夠用就得。」
自言沒有男朋友的向海嵐，平日深居簡出，除了開工之外，大部份時間都會留在家裏，生活相當平淡，獨居的她幸有兩大護法陪伴左右，就是「阿B」和「妹妹」。
阿Ann說：「妹妹係波斯貓，阿B係英國短毛貓，佢哋兩隻都係貓女，好乖㗎，我由細養到大，但第日搬咗屋之後，我希望媽咪畀我養多隻狗，因為屋企地方大咗，狗同貓就可以住埋一齊，最多隻狗仔住喺間屋出面囉。」
撰文：朱芷瑩
攝影：林德雄
協力：何國豪
化妝：Felix
髮型：MattChiufromHeadquarters
服裝提供：LaneCrawford