巴西與德國（包括西德）貴為世界足球傳統強國，兩隊在決賽周的比賽場數名列一、二位；巴西共踢過八十六場；德國八十四場，而各有七次躋身決賽；前者四度捧盃，後者亦三度稱王。
巴西隊長卡富如果在決賽上陣（如無意外也會上陣），便會成為世界盃歷史上，首個連續三屆在決賽上陣球員。他在九四年對意大利的決賽後備上陣，九八年決賽對法國踢足全場。
歷屆世界盃決賽有四次要戰至加時，包括三四年意大利勝捷克二比一；六六年英格蘭勝西德四比二；七八年阿根廷勝荷蘭三比一；同九四年巴西和意大利○比○（十二碼巴西勝）。
巴西連續三屆打入世界盃決賽梗係威水，唔講大家可能唔知，原來巴西自從七○年決賽後，九四同九八年兩屆都冇入過波，原來係紀錄；唔知今晚決賽對新對手德國，可唔可以打破悶局。
今屆決賽周頻頻爆冷，多少同亞洲濕熱環境有關，唔係隊隊歐洲隊都可以適應到呢度的天氣，但今晚巴德之決戰，無論邊隊贏，都會係繼巴西於五八年喺歐洲（瑞典）奪標後，成功越洲捧盃嘅球隊。
巴西嘅「2R」朗拿度同李華度好波不用多講，喺決賽周內自然成為眾守衞嘅侵犯對象，兩個合共俾侵犯過二十八次，而德國兩名防守主力芬寧斯同夏文就是決賽周的攔截王，今晚決賽肯定會見到芬寧斯同夏文追住朗拿度同李華度嘅鏡頭。