政府公布今年大紫荊勳章名單，煲呔曾同詩姑齊齊奪得呢個「有中國特色嘅荷蘭水蓋」。係咪實至名歸，暫且不論，但睇真啲整份受勳名單，其實都有唔少值得一提嘅人名喺度。
今年最老嘅獲勳者，由攞金紫荊星章的年過八十歲嘅曹光彪同蔡德允奪得。曹光彪係著名紅色資本家，港龍航空創辦人之一，女兒係澳門立法會主席曹其真，猛料就唔使講，而蔡德允係著名嘅一代古琴大師，培養唔少學生，也是實至名歸。
另外，今次演藝界亦威威，除咗《臥虎藏龍》奧斯卡攝影金像獎得主鮑德熹同戲劇大師鍾景輝獲銅紫荊星章外，連「龍婆」羅蘭姐都獲頒榮譽勳章。八方重發現，原來羅蘭姐真名叫盧燕英喎！
今次授勳，唔少英勇人士也得到表揚，好似在荃灣銀行械劫案中，因力抗劫匪中槍身亡護衞員ZafarIqbalKHAN獲追授金英勇勳章；今年三月被賊人開槍打死的警員梁成恩，獲追授銀英勇勳章；連早前在執行掃蕩非法屠場而被斬傷的衞生總督察黃偉宏，也獲授榮譽勳章，佢屬下嘅十一名隊員都獲授行政長官服務獎狀。
當然，特首派勳章，梗係唔少得安撫吓班高官，所以喺今年份授勳名單上，八方就見到唔少熟口熟面嘅退休高官名字，包括周德熙、任關等等……一大串，都算攞番個安慰獎啦。
傳真︰2623-9278
電郵︰