鍾楚紅（紅姑）一向注重家庭生活及響應環保活動。紅姑更將其生活哲學，融入兩間家具店Nest及NuConcepts，其中Nest主要代理意大利家具品牌Cappellini，連荷李活影星畢彼特亦是捧場客。
鍾楚紅（紅姑）去年開設了第二間家具店Nest，主要代理意大利品牌Cappellini。紅姑表示打理家具店令生活十分充實，她說：「我只會做我enjoy嘅工作，唔enjoy我唔會做。一個人咁多時間喺屋企，如果間屋整得唔舒服，個人會無晒靈感，成日望住一樣靚嘅嘢，會對你嘅思想有啟發。」近年熱衷環保活動的紅姑，更表示一個舒適的家居與環保很有關係，她說：「一個舒適嘅家，可以令人留多點時間喺屋企，可以唔使浪費咁多資源。」
問到紅姑於家具店負責甚麼職務時，她笑言：「我間中會揀啲好鍾意嘅家具擺設，日常運作會由一班專業嘅同事負責，加上我先生一向好鑽研設計及建築，所以佢對家具有敏銳嘅觸覺，NuConcepts同Nest係佢對Lifestyle嘅表達，佢好希望可以喺世界各地搵啲最優質嘅設計畀香港人享用。我哋喺呢行做咗八年，有啲成績，會有好多牌子主動搵我哋合作，而Cappellini就係其中一個。」荷李活影星畢彼特（BradPitt）、姬妮芙柏露（GywnethPaltrow）及麥當娜（Madonna）等，都是Cappellini的捧場客。
問紅姑對家居的要求，她說：「我係好注重家庭生活，好似以前拍完戲，我都即刻返屋企。其實香港地方細，有人認為會好多局限，好似我喺歐洲見過一間好細嘅屋，係由馬房改建嘅，屋主擺嘅家具唔多，但係擺得好有型。外國人將房屋擺第一，而香港人對居住環境布置嘅priority就擺得好後，寧願買一件好貴嘅衫擺喺度唔着，又或者飲一支幾千蚊嘅紅酒，都唔考慮買家具或藝術品放喺屋企，希望呢種態度會逐漸改變。」她又慨歎說：「好多時啲人可能用一個唔平嘅價錢買件抄款嘅冒牌貨，咁樣只係扼殺咗設計師嘅靈魂。」
紅姑第二間家具店名為Nest，意思指雀鳥的安樂窩，紅姑說：「用Nest呢個名希望畀人有時代感。」Nest佔地四千五百呎，全店均以簡約素色裝潢，營造一份現代及隨意的感覺，主要銷售意大利家具品牌Cappellini。Cappellini由品質到創意都是頂級，部份家具更入選「InternationalDesignYearbook2002」及被英國倫敦的TateMuseum和美國紐約的MuseumofModernArt作收藏。Cappellini主要班底有PhilippeStarck,MarcNewson,TomDixon及RossLovegrove等，如此強勁班底，恰如紅姑所言，每一件都是有靈氣
的藝術品。
採訪：RitaLeung
攝影：EdwardChou
場地：Nest
髮型：BenLeeofWHYB.AND