眨吓眼，世界盃已去到決賽，回想呢個月，由於播映時間啱晒亞洲地區，所以雖然我求大俠日日唔停開工，但都算係欣賞過六十三場比賽，可以同班朋友、同事茶餘飯後噴吓口水，馬後炮一番，算係人生一大樂事；正正由於開波時間咁夾，捧場者眾，所以本地電視台近期為收視問題唇槍舌劍，其實呢啲都係大家嘅宣傳伎倆啫。
上次南韓對德國場四強大戰，根據調查有成三百一十幾萬電視觀眾收看，「三色台」據報大獲全勝，收視達九成；即係話收費台僅剩三十多萬人收看，即係就算以六十萬用戶計，絕大部份都會轉睇阿叔講波，因而再掀起兩台罵戰；今晚加埋「絲帶台」播，相信七點鐘，睇直播嘅觀眾，估計超過四百萬，三色台之後肯定又勁煲兼開祝捷會。
查實着唔着西裝講波，根本唔係大眾揀台嘅主要選擇，實際嘅今屆三色台播得少，大家有新鮮感啫；其實中肯啲講，雙方各擅勝場，睇吓大家鍾意熱鬧，定睇所謂最專業評述，跟住兩台借勢搞宣傳。我反而好奇係今晚加入嘅「絲帶台」會有咩賣點，觀眾會唔會過十萬；如果唔夠數，咁點解唔播其他節目，益吓唔睇波嘅電視觀眾，收視可能重更高？爭嚟有乜謂呢！
德國足總早年曾經送過紀念品畀啲執法球證，哈！估唔到當時送畀今場執法決賽嘅光頭球證哥連拿，會係一個風筒！雖然佢哋解釋話當時重未對哥連拿呢個人好熟識，不過畀着我求大俠係哥連拿嘅話，真係宜得即刻整張黃牌過佢哋歎！
噚日嘅日本橫濱天雨連場，當地氣象局就話今日決賽都會係雨戰，不過有時天氣報告呢樣嘢真係幾玩死人；好似八強英巴大戰咁，嗰陣夠話會落雨，對英格蘭有利，點知成場波想搵滴雨水睇吓都唔見，唔知今次天文台又會唔會「失準」呢？
朗拿度呢位球星日前剪咗個好似話要讓你「半球」咁嘅新髮型，即刻響佢巴西出生地嘅小村莊捲起一片跟風潮，村內兒童連日來排晒隊咁要剪朗拿度個新裝。我求大俠心諗，呢條村咪名副其實咁變咗條「河童村」？