「無事不登三寶殿」呢句話，用喺證券業呢行有時都幾啱，尤其係用嚟形容上市公司同分析員嘅關係就更貼切。點解伏勝會咁講？皆因好多上市公司平時都唔係好想見班分析員，嫌佢哋煩，但又好想借班分析員嘅金口，唱好佢哋間公司。不過自從美國證監會調查分析員利用報告誤導投資者後，本港上市公司同分析員會面時，講嘢都小心咗好多，有個做分析員嘅朋友做過統計，話呢一排啲上市公司請分析員午餐聚會嘅次數明顯少咗，班管理層無端端變得好口密，就連些少無關痛癢嘅資料都唔肯透露，累到班分析員要交功課時好難搵料，結果就苦了班做資料搜集嘅哥哥仔。
講開上市公司開嘅聚餐會，上個禮拜因為有好幾間公司公布業績，好多分析員都分身去不同嘅業績公布會，希望即刻攞到公司嘅業績，同時借個機會問吓上市公司嘅管理層來年發展大計。
上個禮拜五，除咗建滔（148）業績發報會外，貴為深圳市政府窗口公司嘅深圳控股（604），亦喺同一日搞咗個分析員聚餐會。雖然喺聚餐會無乜野講，但唔知係咁啱抑或有心人有意，當日深控喺開完分析員聚餐會後，下午就升咗八個巴仙，而且所有買盤都集中晒喺下午收市前最後15分鐘。
有行家就話呢隻股應該係時候要上位，皆因佢有意開始向基建同物流業務發展，雖然地產業務仍然係佢哋嘅主要收入來源，但如果有市政府嘅支持，加埋佢轉型成功話，30