世盃決賽德巴大戰，究竟朗拿度會否入波打破近屆射手宿命呢？第一個被哥連拿罰牌嘅又會係邊個呢？博○比○波膽之餘，點樣可以爆咗波膽之後重有希望呢？
驟眼睇呢個盤好似唔關今場決賽事，但由於巴西及德國嘅候選球員，今仗又會有「加分」機會，所以巴西「3R」及德國簡尼真係熱得有理。唔信朗拿度可以突破近屆射手只入六球宿命嘅話，可以考慮喺呢個時候押上李華度一注，博佢今場又有靚波入搶盡哨牙仔風頭，又或者博德國門將簡尼繼續神勇；不妨小敲兩人奪獎，分頭尚算可觀。
如果今場戰果一比○，咁樣「首名入球球員」及「最後入球球員」都會係同一個人（唔計烏龍球），所以玩呢瓣賭盤嘅同時，不妨玩埋「首名入球球員」。如果真係有近屆賽事無球員可以於一屆射入六球以上嘅宿命論，朗拿度今場就應該唔會再有入球，可選巴西其餘「2R」李華度、朗拿甸奴以及德國高路斯。
大熱門係八倍嘅德國翼衞薛基，德國中場夏文亦有十一倍，咁嘅分頭真係重抵玩過「首名入球球員」。因為以呢啲大戰嚟睇，兩隊都會踢得份外落力；加上有「辣手判官」哥連拿執法，睇嚟想全場無黃牌（或紅牌）出現真係重難過無入球。
巴西方面，有十三倍嘅卡洛斯以及二十六倍嘅李華度，都可以一博，前者出腳攔截動作夠快又夠準，不過好多時個勢都幾「狼」，食牌唔出奇；李華度就因為之前幾場波嘅一啲「詐死」行為太深入民心，今場球證哥連拿唔知會唔會見佢跌低就以為佢「插水」，整張黃牌佢歎呢？
此項只計法定時間九十分鐘比賽之內有入波球員嘅賭盤，刺激程度絕對十足十，全場入面無論你押注嘅球員幾時入波都得，就算「大包圍」方式出擊，都可以出現「全中」場面！
不過博彩公司就無為較冷門嘅球員開出入波賠率，助攻力強或角球後上頭槌時有斬獲嘅巴西盧斯奧、艾美遜、德國連基等都無得玩，照顧唔到鍾意博冷嘅朋友。
即係只要你選擇嘅球隊，能夠喺法定時間九十分鐘比賽之內不失一球，就當你贏嘅賭盤。以我哋名家波王今日點題認為巴西可勝德國一比○捧盃嘅賽果嚟睇，「巴西不失球」嘅賠率就有一點九倍。咁如果揀晒兩隊，賽果係○比○嘅話，咪兩邊一齊中？係㗎！不過其實兩隊夾埋中晒都係五點四倍，○比○波膽就六倍半（以同一間博彩公司開出盤口計），你會點玩？