終於到咗今屆世界盃最後一場賽事，除咗兩隊球迷之外，日本世界盃組委會方面嘅工作人員都全力準備迎接呢場全球注目大戰，唔想喺場外都輸畀南韓。
不論喺橫濱車站或者距離決賽場地最近嘅新橫濱車站，都設立詢問處方便前來睇比賽球迷查詢，因為決賽係巴西同德國，所以亦有安排多個識得講葡萄牙語同埋德語工作人員提供協助；最特別係原來詢問處為方便無門票球迷可以透過電視睇比賽，特別製作一張橫濱市中心內酒吧名單，列明該間酒吧有多少部電視螢光幕睇比賽，同埋可以容納幾多人，等球迷可以知道邊度有波睇。
由於日本喺出售門票時，被球迷投訴安排比南韓差，呢次總算為球迷安排周到。