向海嵐與郭羨妮及佘詩曼同屬今年無綫力捧的花旦，但有關三人爭寵之說，卻一直不絕於耳，向海嵐更直言與其他兩位姐仔私下沒有聯絡兼「唔多熟」。而月薪約三萬元的向海嵐，既要供一間五百萬的獨立屋，又要租樓自住，差不多整份人工都要奉獻給住屋。
九八年港姐冠軍向海嵐（阿Ann）向來都甚少負面新聞，但近半年有關阿Ann與郭羨妮﹙Sonija﹚及佘詩曼﹙阿佘﹚爭寵的傳聞卻層出不窮，尤其是三位同是港姐出身的花旦現時合作拍《帝女花》一劇，不和之說更甚囂塵上，阿Ann亦不諱言她與其他兩位花旦只屬同事，她在娛樂圈交心的朋友其實另有其人。
阿Ann說：「我同Sonija、阿佘都唔太熟，未拍《帝女花》前，我同Sonija未曾合作過，阿佘就合作過《七姊妹》，但大家冇乜同場對手，𠵱家我哋一齊拍劇，喺化妝間見到面，都會打吓招呼，傾一、兩句。我成日覺得朋友分好多種，我同佢哋係同事，係只限公司入面嘅朋友，私底下冇聯絡，我亦都冇佢哋嘅電話。
「我識郭羨妮嘅時候，佢選緊港姐，當時我已經估佢一定攞冠軍，因為佢斯文淡定，好有港姐feel。佢做《洛神》套劇，我都特登錄嚟睇，我覺得佢係好勤力嘅。至於阿佘就係好活潑開朗嘅女仔，佢亦都好勤力，睇得到佢進步，佢𠵱家嘅演繹方式，同以前唔同咗，我都要向佢學習反省吓點改善。」
這三位無綫花旦現已成為大眾的比較對象，但阿Ann自言對這兩位花旦從沒心病，她說：「有競爭對手係好事，我會更加做好啲，唔會話有乜嘢心病㗎，每個角色係適合唔同嘅人做，冇得話爭乜爭物嘅。」
至於阿Ann的閨中好友，竟是從未與她合作拍劇的黃 「我同陳妙瑛拍《無頭東宮》時都好開心，我哋有通電話聯絡，我同Ada﹙蔡少芬﹚去過溫哥華做嘢，之後我哋都有電話聯絡，再多啲時間嘅話，我諗我哋會做到好朋友嘅。」