南韓踢世界盃，成績好到超乎想像，令中國隊慚愧，但最令所有亞洲地區中國人慚愧嘅，就係南韓人嘅公德心。據外電報道，四百萬南韓人上街慶祝狂歡之後，自動執清垃圾，擺落垃圾袋，條條街都非常整潔。哎吔，我哋嘅大球場在巴西對中國嘅賽事之後，據報道垃圾滿地，做到清潔工人氣咳，唔怪得要向亂丟垃圾之人實施罰款六百大元嘅制度，如果中國人向南韓學習，邊度使罰款呀。
另外，國際足協人員感到震驚嘅，係日本球員用嘅更衣室，賽後與賽前一樣咁乾淨企理，好似冇用過一樣。原來日本隊球員個個自重，球隊亦有專人跟進做執漏，所以更衣室嘅淋浴間、廁所keep得乾淨乾淨好乾淨。左丁山對此小道新聞，非常感慨。上星期寫咗一篇《廁所告示》，認為管理人使乜將清潔廁所，提升到「自重人格」嘅程度。文字見報後，收到兩封電郵，讀者F話：「北角萬誠保險大廈嘅傷殘人士廁所、尖沙嘴新港中心廁所……」讀者J女士話：「國際金融中心（中區甲級寫字樓）自二○○一年嚟咗一大班ⅩⅩ銀行員工之後，廁所地板周邊及地上遍布尿迹血迹……簡直不如公廁……。」嘩，兩位讀者嘅描述，不忍卒睹，部份香港人用廁公德之差，超乎想像。唉，既然香港流行韓風、日風，唔好淨係崇拜日韓偶像得唔得，學埋日韓國民嘅公德心啦，唔該。