謝霆鋒昨日遇上車禍，他的朋友及不少娛樂圈藝人十分關心事件，他們大多希望霆鋒可吉人天相。
容祖兒 ：吓！最緊要佢冇事啦！我都唔知發生乜事，我噚晚先同佢做完嘢，今日就話佢撞車，我做完嘢都會去探佢嘅！
劉偉強 與謝霆鋒因合作拍攝電影《少年古惑仔》而相熟，他說：「我噚日（出事前一晚）先同佢通過電話，約定遲啲見面，我會支持佢，每個年輕人都有曳嘅時候，我會同佢傾乜嘢係應該做，乜嘢係唔應該做，希望佢經過教訓之後會成長。」
梁漢文 ：我噚日有同佢見面同通電話，早排我哋喺佢屋企睇波時，大家寫咗好多歌，希望佢冇事啦，我真係唔知點答你哋，惟有叫佢以後揸慢啲啦。𠵱家只有同佢唱隻《馬路如虎口》。
劉德華 ：佢冇事呀？小心啲啦，大家都唔想嘅。大家應該畀啲空間佢休息，唔好再畀壓力佢。意外歸意外，都估唔到嘅。等佢傷勢好番先再講，擔心咗佢傷勢先啦。
周華健 ：佢成日都有啲咁嘅新聞嘅？佢係咪唔應該再揸車我就唔知，我諗保險公司唔想囉。
陳冠希 ：我非常關心佢囉，我會叫佢小心，但霆鋒份人想做乜都會做，我作為朋友唔會阻止佢，只會關心佢健康。我有坐過佢一次車，揸車梗有快有慢㗎啦。