浚偉（馬仔）日前以四十五萬嘅價錢買咗一架積架房車，噚日佢重專登揸架車出嚟影相。
馬仔好開心咁話架車原本要五十三萬，但當車行經理見佢想買，即刻以優惠價賣畀佢，佢話：「可能我形象健康，𠵱家足足平咗成八萬幾，重送埋天窗。佢哋又肯同我做車保，重平成百分之廿幾，我覺得架車真係幾好意頭。」
而馬仔重喺車內掛上其母喺佢第一次買車後，親手織嘅平安繩，以保平安。
馬仔話覺得新車嘅款式比較摩登，馮仁昭取笑佢香車重欠一個美人，佢笑笑口話：「我有賣廣告，幫架車搵女主人，睇吓有冇人應徵。」
黃璦瑤、樓南光、袁文傑同杜挺豪，噚日齊齊出席亞視總台舉行嘅《風雲》急口令大賽活動，佢哋唔單止做評判，重要上台試玩急口令。
佢哋咁多個之中，講急口令講得最好嘅係袁文傑，黃璦瑤就係講得最差。不過計馮仁昭話黃璦瑤自知講得差都敢上台試玩，真係勇氣可嘉，值得鼓掌。
女子組合Twins形象親民，其實私底下嘅Twins同一般鄰家女孩冇分別。好似𠵱家F4咁紅，Twins亦買咗F4主演嘅劇集《流星花園》VCD。今年初佢哋去內地拍劇時特登帶埋成套《流星花園》VCD去睇，點知Twins即刻中晒F4毒，竟然前後睇咗四次。
張學友前晚率領「2002年音樂之旅」世界巡迴演唱會全體工作人員，喺北京工人體育場舉行「2008──北京期待你」大型公益演唱會。
成個節目以迎奧運為主題，張學友同女舞蹈藝員喺台上載歌載舞，氣氛十分之好，大受台下數萬觀眾歡迎。
有「中國木村拓哉」之稱嘅鋼琴家李雲迪都幾受香港人歡迎，上次佢嚟香港嗰陣，傳媒將注意力集中喺佢棚箍牙上面。當時李雲迪同朋友透露過，話覺得好奇怪，箍牙有乜嘢咁出奇？不過佢話冇所謂，因為知道自己係有實力嘅，所以唔係好介意人哋點講佢。馮仁昭覺得李雲迪都幾有大將之風。
麥家琪、江美儀、姜大偉、張同祖、黎思嘉同饒林紅等一班亞視藝員前晚去九龍城方榮記食飯。
麥家琪前晚以新髮型現身，重見佢瘦咗唔少。佢話：「我𠵱家一百零八磅，想再減三磅呀。修身堂老闆娘張玉珊都有贊助我減肥。」問佢會唔會幫張玉珊嘅瘦身中心任代言人，麥家琪話：「未落實，啱就做囉。」
關心妍同周永恒噚日喺美麗華酒店，出席「敬師愛心心意卡設計比賽頒獎典禮」。關心妍話佢最曳係試過唔返學，後嚟重畀媽咪知道咗，不過佢都知錯，之後重好畀心機讀書。
而周永恒話佢讀書時好鍾意夾埋成班同學整蠱班主任，佢哋重毀壞公物，真係唔啱。
馬德鐘雖然結咗婚，家有嬌妻兼有小朋友，但佢嘅生活依然多姿多采。早排成日有報道話佢鍾意着背心同啲女仔去街，馮仁昭嘅朋友喺上星期四夜晚，喺尖沙嘴嘅海港城商場地下，就撞正戴住cap帽、着住緊身T恤嘅馬德鐘，同兩位妙齡靚女行街，馬德鐘重𠱁到嗰兩個女仔好開心，三個人細聲講大聲笑，睇嚟馬德鐘𠱁女仔又真係幾叻。