阿Ann出道四年，傳過的緋聞有兩則，其一是傳仁濟總理吳守基向她展開追求，其二是傳她與成龍曾有一段情。
對於吳守基的追求傳言，阿Ann笑說：「我係透過趙翠儀識佢嘅，但只係純粹識得，喺活動見到就sayhi，所以我對呢單新聞嘅結論係……好笑。」
以往在訪問中每次提起與成龍的緋聞時，阿Ann總是表現得非常抗拒，對此她也直認說：「係㗎，唔係事實嘅嘢唔想再講啦，我唔想啲人以為我借呢樣嘢宣傳。」但日後她再遇成龍又怎辦？阿Ann卻語氣平淡地說：「我睇唔到會有乜嘢場合見到佢，以前我為呢件事係有唔開心過，不過我唔會記住。」
阿Ann表示她入行以後沒有拍過拖，阿Ann說：「我嘅女性朋友多過異性朋友，同男仔太熟，啲人會以為係拍拖，自己對一啲冇發展機會嘅異性，會保持距離，我想避免冇必要嘅緋聞。入行之後係有人追過我，係圈外人嚟嘅，但我唔鍾意佢，冇機會發展。我個人比較傳統，係睇到有機會結婚嘅，我至會放膽繼續落去。」
做演員有很多機會跟靚仔對手談情說愛，阿Ann卻表示自己從未試過對男演員心動。她說：「我次次都順利抽離角色，一cut我就好清醒㗎喇。同我合作過嘅有魏駿傑、黃日華、羅嘉良、張兆輝同江華，佢哋個個唔係有固定女友就係結咗婚，點可能發展呀？」