小初覺得𠵱家嘅新股愈嚟愈難玩，好似噚日咁，有3隻新股掛牌，兩隻喺創業板，一隻喺主板，今年以來一直係主板好玩過創業板，點知噚日又唔係喎。
兩隻創業板新股，常茂生化（8208）同長春達興（8067）喺表叔全力護航之下，均較招股價高出約4成，反而主板隻騰達（691）股價就低過招股價3成，各位話件事係唔係古怪呢？
經紀陳就擺明窒小初，佢話主板上市公司未必一定叻過創業板。
騰達噚日收50仙，較招股價75仙，低33.33%。
小初覺得騰達呢次急跌事件非常可疑，隻股明明招股價係75仙，但有咩理由第一口價就掛68仙，唔通認購新股嘅人，一開波就諗住最少要輸9％？
同時幕後有關人士，竟然由朝到晚頂都唔頂下，全無誠意，試問下次搞新股上市，重有咩人會肯幫手？
慕容小初