決賽早在東京展開，講嘅唔係四年一度世界盃決賽，而係Nike鐵籠足球日本區比賽，不要以為比賽雙方係日本年輕一族就欠吸引力，碰上日本國寶中田英壽同型仔小野伸二助陣，肯定不枉此行。
雖然東京沒有辦世界盃的比賽，足球氣氛一樣熾熱，位於東京代代木體育館的「NikePark」足球主題公園，跟足「蠍子廣告」，以迷幻燈光襯托鐵籠足球比賽；由上月三十日開始打到本月三十日，打足一個月，規例跟足廣告一球定勝負，輸波即時出局，而每天均產生各組優勝隊伍。優勝者除得到豐富獎品外，肖像同大名更被製成蠍子海報貼在公園內，認真夠「威水」。
唔識踢波嘅球迷嚟到NikePark都唔會悶，你可以揀個球星同對手大打電腦遊戲，又可以在攤位遊戲玩吓，重有豐富獎品。身為Nike代言人的中田英壽同小野伸二，早前更趁住日本隊冇比賽期間，現身NikePark，指導年輕一代踢波，重同大班球迷合照，夠晒親民。