自從本欄寫過阿樂之治癌療方後，好多讀者來函或電郵索取副本。秘書小姐應接不暇，可見癌症之令人恐懼，癌症之廣泛。癌症有冇得醫，好難講，總之個個都好驚，對所有民間配方都力求一試，寧可信其「得」，不可信其「唔掂」。於此亦可領悟一個商機，就係潮流興生命科技、保健藥物，若有所謂生命、生物科技公司將一啲治癌藥方研究、提煉，搵GMP藥廠濃縮成藥丸，當中藥產品銷售，應有可為。
秘書小姐做唔切之餘心生一計，午飯時候走到中環三聯書店搵書，卒之俾佢搵到阿樂嘅著作，名為《阿樂珍藏秘方》，立即付出八十大元，買咗番嚟畀左丁山睇。左丁山自然知佢心意！此書出版於九八年，二○○二年一月出第二十五次版，內裏載有不同嘅治癌藥方，各位讀者以後請自己去書局買，唔使來信索取部份藥方咯！
癌症令人頭痛之處，乃難醫之餘，兼夾所費甚大，好多家庭負擔唔起。《蘋果日報》喺六月二十五日（B5版）大字標題：癌症保健計劃，5年無上限醫療服務。為之睇到心郁郁，「安美國際」與「達信風險管理及保險服務」呢兩個大機構聯合與港安醫院推出癌保，年費一千九百五十元至四千四百八十元，好似唔算貴噃，最得人驚嘅係估計癌症醫療費用高達三十五萬二千元，一般人點可以負擔呀，唔怪得咁多人有求於民間藥方，唔信中藥嘅話，惟有買保險啦。