咪以為做署長好威！教育署長張建宗有次晨咁早，喺打上堂鐘嘅時候去到一間中學探訪，開門個阿嬸竟然問佢攞身份證登記，然後指佢去二樓行到尾個校務處入面嘅校長室。張署長去到校務處，職員就話「校長去咗巡堂，你坐喺度等吓啦」，然後眼望望，怕且覺得佢好熟面口，但又唔認得佢係邊個。三分鐘後，校長回朝：「張……張……張署長，乜……乜……乜你嚟咗呀？」原來教署喺前一日通知校方張署長巡校，但唔知點解校長就係唔知署長大駕光臨。
最精采嘅係，張署長跟住去課室睇上堂，入到去，就見到有三個學生已經瞓着咗；署長重叫老師唔好叫醒啲學生，話佢哋瞓咗可能重好，好過佢哋搗蛋吵鬧。
呢間學校係張建宗口中重未搵到跑道起飛嘅其中一間學校，佢話全港三分一學校已經飛得好好，三分一啱啱起飛，三分一正在滑行，少數重未搵到跑道。
張建宗下星期一就會升職做負責勞工事務嘅常任秘書長。喺教署呢兩年，係佢上位嘅踏腳石，拼搏非常，一有大單小小嘅嘢，佢就即刻撲埋去「冚火」；兩年來夾埋只係放過一日假，即係冇咗110日假期，重係每日「7-11」工作最少16小時。
嘩！好彩今次上到位啫，唔係就喊得一陣陣。之前都有老友話，如果佢喺教署坐多過三年就慘喇，因為教改啲怨氣就會發晒喺佢身上。
傳真︰2623-9278
電郵︰