日本人絕對緊貼潮流，甚至創造潮流，雖然世界盃熱潮喺日本正逐漸冷卻，但模仿球星髮型熱潮依然不減。
全世界球迷正期待星期日在橫濱舉行的終極之戰，見證今屆世界盃冠軍究竟係巴西還是德國；小記亦已轉到日本，等候冠軍誕生的一刻。早前，碧咸在日本比賽掀起當地年輕人爭相剪「碧咸頭」，就算英格蘭已經出局，喺東京街頭不難見到這個髮型。
不過，最令小記驚奇嘅就係居然發現真係有人剪了朗拿度「十兄弟頭」；無錯，朗拿度人氣又再次急升，重分分鐘成為世界盃冠軍球員兼神射手金靴獎得主，之但係朗拿度呢個髮型十分「騎呢」，唔係咁容易模仿，相信除巴西球迷外，就只有日本人可以唔理會其他人點睇照跟到底，日本果然真係一個無奇不有嘅國家！
自從碧咸走咗之後，德國「鋼門」簡尼就成為日本女球迷追捧對象，佢雖然唔係「靚仔」，但佢哋鍾意簡尼夠大隻威猛，好有安全感嗰隻；若果德國真係捧走世界盃冠軍，有無日本人仿效，去健身練肌肉變「筋肉人」呢？