今屆世界盃掀起亞洲足球熱，打起咗幾個亞洲球星，而球王比利噚日又話下屆應該畀多個亞洲出線席位。亞洲咁馨香，身為亞洲人值得高興；不過咪話我求大俠潑冷水，我好擔心世界盃一玩完，呢股亞洲熱好快會消失。
唔使講咩，最近南韓報章猛吹安貞煥成為歐洲大球會羅致獵物，而利物浦更會出到一千萬美元嘅高價。我就諗，連踢到曉飛嘅迪奧夫都係值千四至千五萬美元，點計安貞煥都唔值咁高啩。話唔係南韓傳媒製造新聞，我就打死都唔信嘞。
講番比利嘅說話。雖然南韓同日本今屆都踢得好，但咪忘記佢哋有主場之利；再諗埋我哋嘅龍之隊同西亞大國沙地阿拉伯都輸得大大鑊，睇嚟亞洲同其他地區重有一段距離，下屆想好似今屆咁有四隊參賽都難啲喎。
重記唔記得，我求大俠早兩日咪講過有個賊趁世界盃打劫柏林銀行嘅故事？原來除咗嗰單嘢之外，之前響柏林已經有兩單同類劫案。柏林警方發言人好開心咁話，好彩決賽響禮拜日舉行，銀行唔開門，如果唔係佢哋可能又有排搞。咁都得？
德國隊殺入今屆決賽，真係連佢哋足總都估唔到，點解咁講？原來德國足總無預到國家隊會入到決賽，所以之前只係向賽會訂咗一千張決賽飛，搞到德國球迷𠵱家要四圍撲飛，真係幾濕滯。
自從巴西晉身四強後，巴西聖保羅醫院宣布唔會響巴西比賽日進行任何手術，理由係怕病人為球賽興奮過度或者擔心戰果而影響手術。不過有口痕佬就話根本係啲醫生自己都想睇波，費時做手術時分心搞出事至真。
德國前鋒高路斯響分組賽頭威頭勢，三場波省入五粒，之不過佢好似無咩後勁，連續三場食白果。呢位哥仔話原來佢儲緊氣，諗住留番啖氣響決賽一次過發功，有信心到時一定有波入喎，真係要拭目以待嘞。