綜合過去一個月喺度講過嘅一啲揀盤心得，得出咗今日好大機會開出土耳其下盤嘅結論。而且呢隊歐洲新貴今屆每逢受讓都多數贏盤，今仗相信亦不例外。
早前喺度講過，我哋其中一位名家波神鑽研出嚟嘅「低水必索」理論，喺今屆世界盃真係幾掂，即係好多時都係個回報折頭較低水嗰個盤得手。今場睇嚟全世界都係認為南韓仔喺主場比賽，必定要爭呢個季軍返嚟，鬥志會好啲；結果初盤開咗，果然係南韓仔讓平手/半球。
不過，大膽講句，兩隊波今場都無必勝把握，土耳其咁樣受讓法真係想唔低水都唔得，照睇呢個盤會一路企硬唔郁。引用番呢個「低水必索」理論，難道今場土耳其真係可以坐和望贏？
另一個「睇盤路強弱勢」去捉路嘅揀盤方法，喺今場似乎都屬意開出土耳其下盤。對上一場賽事係三日前巴西對土耳其，當時巴西盤口由頭到尾都係讓一球，結果巴西真係算有料到，係咁㩒住班土耳其仔嚟攻；不過「餐士」雖多，但係土耳其門將魯斯度就上晒身咁，全場淨係畀朗拿度射入一球，結果個上盤就「搶」足全場，但最後都係開唔到。照呢個勢嚟睇，上場個上盤咁「掹水」，呢場重唔轉開下盤？
事實上，土耳其呢隊歐洲新貴奇兵，今屆賽事試過三次成為受讓嘅下盤，結果就為捧場客帶來兩贏一走盤成績，呢場波又受讓，真係有利。