做民政事務局，當前要務梗係力推賭波規範化，之前「賭后」馮程淑儀一路做一路學，而新任局長何志平睇怕都一樣。皆因佢噚日接受電視台訪問時，直言自己唔鍾意賭，連麻雀都唔識打，係「魚腩」一名。何局長話，賭波規範化無時間表，而且都要考慮各方，包括宗教、教育界嘅意見；真係開始有官格嘞。
尚未上正場嘅何局長，噚日重踩場搞關係。話說機管局昨日宴請十八區區議會正副主席，何局長得知此聚會後，喺秘書長契媽李麗娟陪同下到場打招呼。雖然有區議員笑言佢喧賓奪主，但何局長自掏腰包埋單找數，認真識做。八方聽聞，主席們對這新人都好客氣，無乜畀下馬威佢睇。
傳真︰2623-9278
電郵︰