有冇諗過住宅屋苑會提供遊艇作住客會所?如果你買上海家化濱江苑單位，就可享用呢種設施嘞。
發展商上海家化置業虞總話，公司買咗艘50呎長嘅遊艇，供屋苑住戶使用，只要800至1000元人民幣便可租用半日，遊艇可駛出黃浦江，效法隋煬帝，沿長江暢遊一番。佢話香港富豪擁有私人遊艇唔係新鮮事物，但內地卻未批准私人擁有遊艇，𠵱家以遊艇做會所，相信係內地第一家。當然屋苑重有另一個會所。
另外，上海政府計劃響嘉定安亭搞一級方程式賽車場，預計2004年啓用，將來係世界一級方程式賽車第17站。
市區重建局響下個禮拜二，正式搬入上環新紀元廣場低座，新址有成6萬方呎，重設資訊中心，等市民有得睇有得問，同時又整咗以市區重建為主題嘅電腦遊戲，令市民可寓認識於遊戲，相信點都好過硬銷嘅。
今個月世界盃引起全港哄動，除裝咗有線嘅食肆，生意大增之外，其他行業都受到影響，地產代理嘅生意少咗，部份預見呢個情況，早響月初已大減廣告費用，留番7月先重點出擊。
發展商推盤興大搞嘉年華會，桂洪集團元朗牛潭尾峰景豪園，喺回歸假期同之後嘅兩個禮拜六日，安排Q版人像畫、小丑表演、彩沙擺設及皮具首飾製作示範等節目。發展商尋日開記者招待會，更即時邀請畫師，為發展商同代理畫番張Q版人像畫，獨家代理美聯張錦成（圖右）重話要鑲起幅畫㖭！
蘭西