李彩樺昨日趁自己不用開工，與母親逛街做孝順女。李媽媽被問及曾否見過女兒的緋聞男友林峯，她表示睇電視時見過。問她覺得女兒是否與林峯很登對，李媽媽則說：「無綫搵佢哋做一對，梗係登對啦。」
李彩樺偕母親、方子璇偕妹妹、周美鳳和顧紀筠昨日分別到中環逛街，李彩樺身穿背心，展示減肥成功的fitfit身形，她表示減肥過程需戒掉致肥的食物，連她最愛由母親炮製的盬焗雞也不能吃。
李彩樺昨日說：「我𠵱家都幾慘㗎，只可以食粥同灼過嘅菜。屋企人食飯時，我為怕受其他美味餸菜嘅誘惑，惟有拎埋自己食嗰啲食物入房食，好似好可憐咁。」問李彩樺減肥後有否獲得朋友如林峯的稱讚？她說：「好多朋友都有讚我靚咗。」
而在旁的李媽媽亦大讚女兒孝順，她說：「我同個女感情好好，呢排都有一齊睇波，生咗佢可以話係上天畀我嘅恩惠。」記者問李媽媽曾否見過林峯？她笑說：「喺電視咪見過囉。」再問她覺得林峯與女兒是否登對？李媽媽則說：「登對，無綫搵得佢哋做一對，梗係登對啦。」
此外，方子璇昨日與剛自外地返港、十一歲的妹妹Susanna在置地茶座歎茶，方子璇表示本打算帶妹妹往海洋公園玩，但由於天氣太熱，取消計劃。問方子璇近況如何，她表示正在學習小提琴，她說：「我遲啲會喺台灣出唱片，走創作歌手路線。」至於同屬嘉禾公司的安雅在台灣涉嫌服食搖頭丸事件，方子璇則說：「我冇聯絡過佢，都唔知有乜可以幫到佢。」
採訪:DebbieLum、JessicaNgan、MaggieFung
攝影:WongManShing、RickyChan