蒙嘉慧（YoYo）最近接咗無綫一套新劇《衛斯理》，七月中開拍。喺戲入面YoYo飾演白素，需要揮拳弄劍，噚日YoYo喺電視城由專人指導下學番兩招。
不過YoYo噚日姍姍來遲，足足令活動遲咗半小時先開始，YoYo解釋話：「我以為係三點鐘先開始，點知搞錯咗，所以連鞋都冇着好，踩住踭嚟囉。」
眼見YoYo所擺嘅甫士好牙煙同唔夠紮實，YoYo話：「其實我只係學咗三堂，之前我跟盧惠光學過泰拳，今次要學嘅係近似跆拳道，所以要將之前學過嘅嘢忘記晒先。其實咁樣重慘，因為好多手勢都已經慣咗。」
貴為幾間鞋店老闆娘嘅顧紀筠，噚日下午三點幾出現中環分店。佢身上嘅行頭認真唔少，除咗手上戴咗隻三卡嘅鑽戒之外，頸重有一條南洋珍珠鏈，問顧紀筠係咪巡視業務時，佢話：「係呀，當係鼓勵吓員工士氣，我都想開多間分舖，不過好嘅舖位都要等到八、九個月先搵到。」
無綫為迎接七月一日回歸慶典，喺一號同二號嗰兩日作出節目調動。七月一日晚上張衞健主演嘅《少年張三豐》將會提前七時播映，緊接就會播出《回歸五周年煙花滙演》。七月二日晚上，《皆大歡喜》亦要讓路，播映港台節目《龍聲飛揚萬人青年音樂會》。
珈潁噚日一身wet妹打扮為亞視新劇《虎差》試造型，問佢係咪私伙衫，佢話：「衫係公司嘅，好在啱身。我自己好少呢啲wet衫，不過遲啲會重性感。」
劇中珈潁扮演私鐘妹，最後重殺死自己最心愛嘅男人，對於第一次做殺人犯，珈潁話極富挑戰性，重因為想演好角色而正積極減肥。
亞視節目《尋找隱世醫術》好受歡迎，有好多人因為咁就走去搵隱世醫生。無綫有見及此，就走去搵讀緊中醫嘅黃德如主持大局，推出一個實錄式專題系列節目《中西醫療坊》，好似要拆亞視招牌咁。黃德如噚日喺尖沙嘴重話：「近年有好多人將中醫神化，我哋係要將正確觀念話畀人聽，叫人唔好迷信。」
金慧英之前喺尖沙嘴金馬倫道，開咗間得十呎嘅精品店「MyHearts」，因為生意唔錯，所以進軍中環士丹頓街蘇豪區開分店，新舖面積有七十呎。新舖都係由金慧英自己設計，連個五呎乘六呎嘅大招牌都係佢自己畫。但因為佢用鉛筆起稿，掛咗個招牌上去之後俾射燈一射，啲鉛筆痕出晒嚟，所以最後佢要爬樓梯上去補番啲油。
崇光百貨噚日舉行嘅資生堂展銷會，出席嘅唐文龍竟遲到三十分鐘。講到佢日前拍無綫劇集《帝女花》大爆粗口，佢話：「係自己唔啱！嗰日天氣好熱，自己又NG咗五、六次，所以心情唔好，我係𤷪自己，都冇向同事發脾氣，真係唔好意思。」問到佢有「媾女王」之稱，以後拍劇會唔會同女演員保持距離，佢話：「多謝傳媒關心，所以先寫我。」
張徹契仔李修賢、姜大偉、張同祖同邵氏高層黃家禧，噚日喺尖沙嘴商討張徹出殯嘅事宜，姜大偉話：「個儀式會莊嚴、簡單而隆重，張生生前想火葬，亦會以張太意願葬喺將軍澳墳場，重考慮會做啲導演用品燒畀佢。」至於張太點解冇到場，佢話：「今日係張生嘅頭七，張太喺屋企幫張生執嘢。」據知到時六叔邵逸夫亦會出現。