近呢幾日氣溫急劇上升，平均都有三十度以上，相信大家雪櫃內嘅飲品或食品都開始減少，亦係時候要入定貨啦！水果、雪條、飲品三種貨品絕對啱夏天食及飲，以下係小記喺吉之島內精選嘅貨品，部份好抵買之外，重係新產品㖭，今個禮拜未有節目，不妨到吉之島一趟，可能有意想不到嘅收穫。
記者：陳冰麗攝影：黃子偉
Model：Bowling
另外由下周三起，一連七日，同樣喺吉之島七間分店內(康怡、黃埔、樂富、慈雲山、屯門、大埔、將軍澳)將舉行「台灣水果節」，當日有嚟自台灣唔同種類嘅水果，等小記率先介紹其中兩款特色芒果（愛文芒果及金煌芒果）畀大家先食為快，想知水果節重有其他特色水果，就勿失良機啦！
正宗日本溫室蜜瓜一個閒閒哋要數十元不等，不過經由日本移植到中國種植嘅呢款溫室蜜瓜，價錢就平得多，每個十五蚊有找，比日本種經濟好多。雖然係國產貨，但質素都相當不俗，食味甜，質爽帶清香。每個大概三、四磅零重，雪凍咗食更佳，蜜瓜解渴之餘又夠滋潤㖭！
消暑水果
呢款芒果係台灣出產，嚟緊嘅水果節都有佢份。呢種芒果認真夠份量，一個重兩磅半以上，最大接近三磅重，應該足夠四人享用，特價十蚊鬆啲，除番幾個人食都抵。金煌芒果皮薄肉厚，食味非常甜，且帶芳香味，芒果癡絕對要試試。
愛文芒係台灣另一特色芒果，又叫蘋果芒，其果皮帶橙紅，果形呈卵形，Size則無金煌芒咁巨大，平均一個大概三百零克重，果肉幼滑纖維少，食味甜而帶清香，六至七月係佢嘅盛產期，難得有機會食到，又點可以錯過呢！
橙酸甜味道亦有解渴怡神功效，雖然四季都可以食到，但要買到又平又好食嘅則可遇不可求。最近喺吉之島出售嘅美國新奇士橙，食落好甜，唔少識貨之人都爭相入貨，有興趣都要趁手買，皆因呢個價錢只做到下月一日止。細橙係88裝，而大橙則係72裝Size，兩者都好抵。
特價雪條甜筒
樂天最新推出嘅呢款樂天爽，食落頗為過癮，軟滑嘅呍呢拿雪糕內夾雜啲碎冰粒，令你愈食愈透心涼，名副其實好爽。新產品關係，特價出售，只係原價嘅一半再平啲，認真超值，欲購從速。
Dreyer's皇牌雪糕現正超低價出售，由原價六十零蚊減至二十零蚊盒，足足平一半有多，每盒內有4支雪條，外層係朱古力批，內裏則係呍呢拿或曲奇雪糕兩種口味，外脆內軟，雙重口感。
另一款Dreyer's產品甜筒，亦係抵食之選，跌幅接近五成。唔想齋食雪糕咁寡，食甜筒最好，二十蚊有找，內有四支甜筒，重唔係抵。有呍呢拿及曲奇兩種口味任揀，人多嘅話不妨買多盒，特價唔係成日有㗎！
解渴飲品
茶有消滯兼解渴功效，飲茶始終都較飲汽水有益健康。而近呢兩年更盛行飲用綠茶，聽講日本人飲得綠茶多，命都長啲，信不信由你。呢款中國綠茶係佢哋其中一款綠茶飲品，包裝精美，茶味清香，解渴怡神。
維他至尊咖啡味道較淡，但勝在清香，方便飲用。雖然出咗都有一段時間，但有如此特價優惠就非時時有，平時買一包要三個零，家陣特價每包三蚊有找，幾抵飲㗎！
豆漿係用黃豆所做，營養高，無論小朋友或老人家都啱飲。唔鍾意飲奶，飲豆漿可作為吸收鈣質嘅另一好方法。現正做特價嘅金光鮮豆漿，每盒平三蚊，容量946毫升，另重有低糖鮮豆漿供選擇，價錢一樣。
平時一支容量500毫升嘅道地綠茶大概都要八個零，現六蚊一支有找，非常抵飲，不過只限於康怡吉之島店售，有蜂蜜綠茶及檸檬綠茶兩種口味供選擇。