港股噚日上午挾咗一轉，主要係有人憧憬道富環球下午會掃貨，可惜事與願違，全日都未見過道富有任何動靜。
噚日有3隻新股上市，常茂生化（8208）及長春達興（8067）分別較招股價高出40％及37.8％，表現相當不俗，惟獨騰達智能（691）首日掛牌較招股價低33.33％。
黑客話，騰達幕後經過噚日一輪收集後，貨源差唔多歸邊，後市隨時可以步步高升，反而常茂生物及長春達興可能會有回吐。
明日國際（760）曾話過洽購藥業，重想轉型至以藥業為主嘅生化股，希望可以食正長江生命科技上市呢個熱潮。不過，可惜最近聽講話幕後人士暫時缺水炒作，而近期明日國際股價偏低，現價配股又冇乜着數。Cookie話，幕後人士暫時只會將焦點放喺恒光實業（663）身上，下周此股可能會有異動，噚日股價上升4.3％，不過成交重未成氣候，只得1.86萬元，但乾升之餘，同時亦顯示貨源歸邊。
達利國際（608）噚日勁挫31.5％，收報1.35元。達利跌得咁重，主要係因為公司業績倒退逾80％，派息只得１仙，令早前入市增持嘅基金大為失望，因而將其洗倉。1.30元係達利短期嘅低位，照計唔容易跌穿，不過若此關一穿，就好有機會下試0.80元水平。
達利中期每股盈利為3.6仙，假若全年係只得7.2仙，PE高達19倍，而一般工業股，PE只係5至6倍。
阿虎