電眼靚佬梁朝偉（偉仔）噚日四十歲生日，佢前晚同一班專誠由韓國同日本嚟香港嘅fans，喺銅鑼灣邀月茶館慶祝，偉仔女友劉嘉玲日前去咗台灣公幹，所以冇到，但偉仔就坐住嘉玲架平治房車到場。
講到生日願望，偉仔話：「身體健康囉。」偉仔早排整親隻腳，佢話：「冇嘢啦，唔好再有事就得喇，年紀大唔想再整親。」偉仔話人愈大愈知道要珍惜身邊人，問佢要珍惜邊個？佢就話：「阿媽同阿妹囉。」但點都唔肯講嘉玲個名。
問偉仔今年收到乜嘢生日禮物？佢話：「鬚刨、餅乾同薄荷糖，啲朋友知我平時成日打乒乓波，所以買零食畀我。」問佢嘉玲送乜禮物，偉仔甜絲絲咁話：「唔好講呢啲啦！」但佢就笑到極之冧，睇嚟嘉玲份禮物好啱佢心意。
古天樂（古仔）噚日去台灣宣傳劇集《尋秦記》，呢套劇下個月初會喺台灣TVBS電視台播出，所以無綫特別安排古仔去台灣做宣傳。TVBS為宣傳套劇，重以古仔喺《尋》劇嘅造型，特製咗幾款Q版公仔送畀fans。
徐楓前排請咗李嘉欣去上海，出席上海摩納哥領事館開幕派對，而摩納哥王儲阿爾拔王子亦有到場。嘉欣覺得阿爾拔王子份人好隨和，而且好有幽默感，佢哋兩個重好巧合咁搭埋同一班飛機離開上海㖭。
莫文蔚同梁詠琪（GiGi）噚日分別由外地返香港。GiGi噚日下午三點左右抵機場，現場有fans問佢攞簽名，冇化妝嘅GiGi一見記者影相，就即刻用手遮住塊面，佢話：「冇化妝，唔好影啦！我啱啱喺日本拍完外景返嚟。」
吳奇隆因為喺廣州拍劇，唔小心整傷胸椎骨，前日佢經理人公司將佢喺廣州送返港，入住養和醫院。噚日佢公司嘅同事都有去探佢，原來吳奇隆已試過落床步行，估計要再做一個星期物理治療，先可以出院。