高官局長出籠，市民反應平平，根據嶺南大學嘅民意調查，市民對三司十一局人選嘅評分唔高，近乎冷淡㖭。更弊嘅，就係特首嘅民望，在高官名單宣佈後，不升反跌。
合情理啲睇，我哋應該畀呢班人一個機會，等佢哋合作吓，做出成績來。但蜜月期唔會太長嘅，三至六個月啦，如果二○○三年一月之後，失業率仍在七巴仙以上，睇怕特區管治班子會俾人鬧到暈。《蘋果日報》心水清，指出港大七三年係一個好好嘅vintageyear，十四個「內閣」成員，有四個係七三年港大畢業生（梁馬葉廖），連埋啲秘書長嘅，港大校友佔大多數（冇五位空降部長之前，比例更大），所以有人話港大係天子門生，的確冇錯。口痕友以此「悶」中大賓架：「港大專出高官噃！」賓架以英式幽默回應之：「ThatiswhyHongKongisintrouble！」
邊間「大」都好啦，無論黑貓白貓，能捉老鼠就係好貓，如果啲「殺牠死」老友係得嘅，叫晒港大七三年經濟系畢業友做高官又點話。但有一樣令人擔心嘅就係一啲「熱烈祝賀廣告」，人哋做官，你去登廣告祝賀，當然完全有自由，但亦都反映咗香港人回歸舊文化──捧場拉關係──似足曼谷吉隆坡馬尼拉啲唐人街。唔好以為呢啲係小事，登多十次八次同類廣告，以後點都涉及「情面關係」，進入灰色地帶令李少光頭痛！