世界盃接近尾聲，德國差巴西一班波，相信巴西可5度奪標。趙飛雲前晚睇美股走勢，緊張過巴西對土耳其，杜指大部份時間喺9000點之下掙扎，尾市出現奇迹反彈，杜指一度倒升34點，最後收9120，僅跌6點。納指早段創911事件後低位1375後，亦扭轉跌勢，倒升5點收市，收1429。
美股戲劇性收復失地，按牌路噚日開市可撲入買恒指Call輪9045博短線反彈，但諗到期指結算日，淡友會力壓結算，所以唔敢輕舉妄動，結果淡友未見有大動作，港股反彈幅度較趙飛雲預期大，補回部份前日下跌裂口，大升162點，收10518。
雖然恒指整體技術仍偏淡，大部份人仍睇淡後市走勢，但恒指迅速大幅抽回10400支持位之上收市，亦唔排除可能短期見底，因此短期若見恒指守穩10400，須有心理準備隨時追貨。
下周二盈富（2800）推出發售，銷貨速度將成為大市炒上炒落嘅藉口，目前一般人都憂慮推出盈富對股市有壓力，但近排藍籌股沽空十分狠，唔排除會有大戶買盈富平倉。總之近期睇市要靈活，唔好死牛一面頸，把握到今次轉角市，可能全年唔使憂。
趙飛雲