【本報訊】七月一日開始出任新的房屋及規劃地政局局長孫明揚強調，上任首要工作是穩定樓巿，七成巿民完成置業的目標不再需要。
孫明揚說：「係咪一定要硬性規定百分之幾嘅巿民置業，我覺得值得商榷。𠵱家嘅環境，即使租樓住都可以安居樂業，唔可以揠苗助長。」
對於處理房屋政策的感受，他說：「唔好講係一項苦差，我個人好樂觀，我覺得呢次係一個挑戰。」他表示要照顧弱勢社群，亦要平衡各方利益，他不覺得有官商勾結的問題。
公屋聯會主席兼房委會委員王坤說：「訂定置業人數嘅指標變相迫巿民買樓，孫明揚𠵱家作為房屋政策唯一發言人，應該要承認七成置業嘅政策係有失誤，以免又係唔清唔楚，令樓巿再度混亂。」
另外，近年因短樁醜聞備受責難的房屋署署長苗學禮昨日告別房委會，稍後調任財經事務及庫務局常任秘書長。對於未能繼續處理房屋事務，苗學禮說：「如果係短樁問題令我做唔到房屋嘅秘書長，我都無級升啦！」