準決賽巴西對土耳其最令人難忘嘅，未必係朗拿度射入球靚波，而係四個土耳其球員一窩蜂撲向巴西中場丹尼臣，希望搶佢個波嘅一幕。多得呢位令人又愛又恨的「插花王」，先至令充斥悶戰嘅今屆賽事帶來衝擊。
當晚我求大俠響間餐廳同成棚人一齊睇波，當丹尼臣下半場入替時，在場即刻出現兩種唔應該共存嘅反應──噓聲四起同埋拍掌叫好。噓佢嘅，係知條友射術唔掂，唔慌有入波睇；拍掌嘅係知佢鍾意插花，娛樂性豐富。
結果呢位仁兄無令大家「失望」，錯失咗個入球機會，搞到班想巴西贏兩粒嘅擁躉媽聲四起；但係佢玩插花又真係好搞嘢（我求大俠即刻諗起田雞響電影少林足球玩假腳嗰幕）；到完場前佢重響右輔位死護住個波，搞到班土兵火都嚟埋，好似速龍咁撲向佢度，有睇波嘅人都高呼好過癮啊！
朗拿度前晚好威風咁入咗球靚波，但據報話佢入波前俾敵將布倫特揼咗佢一嘢後，扯火到差啲同人打交；好彩佢重有理智而又有班好隊友阻止，如果因為咁搞出事俾人趕出場或者受傷，就做唔成英雄囉。所以話英雄同狗熊，有時就係一念之差。
中央電視台網站體育頻道日前引述厄瓜多爾電視台消息，話最近被意大利人恨之入骨的球證摩蘭奴已經俾意大利黑手黨槍殺，連中三十槍，有埋佢遇害時坐架車中彈嘅相，兼引述埋佢親人嘅悲痛說話。呢啲咁惡意中傷嘅報道，我求大俠實在不敢苟同。
噚日姚明果然不出所料成為NBA新秀狀元，國內同香港嘅傳媒當然大肆報道啦，唔知佢哋對NBA唔熟抑或收錯啲流料，竟然一窩蜂話姚明係NBA史上首位非美籍嘅新秀狀元；查實八四年同樣俾火箭以第一選選中嘅奧拉祖雲，先至係NBA首個非美籍嘅新秀狀元，當時佢係尼日利亞籍，其後先入籍美國，千祈咪搞錯啊！