美股周三先急挫，後急升，冇散到。港股噚日亦出現反彈，雖未能收復前日失地，但恒指已上番10400之上，收報10518，升162點，成交只有66億元。但大跌市成交多，升市成交少，美中不足，始終新一批盈富（2800）未全被「消化」之前，大市都唔會有大作為。
噚日個市都算得硬淨，高開之後有沽壓，但回落到10400水平，又見有買盤趁低吸納，之後行情就反覆上揚，並以接近高位收市，個別二三線股表現更為突出。
港股雖超賣，但投資者未敢入市，驚美國唔知幾時又會有「公司炸彈」爆炸也。不過，噚日同一位投資界資深人士傾開，佢話美國大企業九成九都係「五大」嘅客仔，安達信出事後，唔少大企業要搵過新會計師，九成要搵番「四大」。新人登場，自然要睇番以前嘅帳目，有做過手腳者，無所遁形，必然爆煲。佢話新會計師行「Check」數已有一段時間，呢一頭半個月應該係爆煲嘅高危期，過咗呢段時間，先可以「唔使驚」。
美股杜指周三曾跌穿9000大關，其後重返其上，又嚟一次單日轉向，而且在收市前一個鐘頭先反彈，升得好急，而納指則力保1400，美股近日表現得好反覆，是否到底，仍待觀察。
事實上，分析家對美股後市睇法有好大分歧，單係大摩裏面已經大打對台，羅奇睇淡，碧斯則唱好。女股神科恩係美股大好友，睇好立場不變。
長江生科下月初招股，噚日長和系概念股已開始熱身，和記港陸（715）同辰達永安（1189）都見有大盤掃貨，前者收0.78元，升4仙；後者收5.9仙，升3個位。二三線股近期由高位大幅回落，若然反彈，亦必然會好有氣勢。大市雖受種種因素掣肘，短期或難有作為，但會趨向個別發展，熱門概念股好有機會成為追捧對象。
郭兆誠