「壬午年五月十八，宜祭祀」，呢句唔係王家衞《東邪西毒》嘅台詞，只不過係長實傳真嚟嘅邀請信印咗呢句話，但同祭祀有乜嘢關係，要等佢哋今日開估。
長實今日下晝兩點三為尖沙嘴港景峯全新售樓處舉行開幕儀式，佢哋話呢個係吉時，屆時趙國雄會公布港景峯最後一期嘅推售安排，而會同滙豐銀行聯手推出突破性付款辦法。
空中花園單位畀人嘅印象係貴價貨，但𠵱家二千幾蚊一呎就有交易，中記賴作智話，上水欣翠花園3座D室，1016方呎，233.8萬元易主，呎價2301蚊，買家係同區換樓客。
仲量聯行噚日代理拍賣大埔林錦公路一批共130萬方呎農地，竟然可以吸引到唔少大發展商到場，好似九龍倉、九龍建業、太平協和同永發置業等上市公司。雖然開價3000萬元，即每方呎只係23蚊，但都冇人承價，最後惟有收回。仲記投資部主管盧慶雄話，今次有10幾個有興趣買家到場，開價又保守，仍冇人承價，反映買家對農地態度審慎。九倉助理物業拓展經理袁志偉話，幅地皮需要申請改變用途，集團興趣唔大。
蘭西