何柱國與何超瓊日前被指秘密交往，更傳何柱國與交往兩年的羅麗莎因此感情轉淡。何超瓊昨日否認與何柱國交往，但坦言不會減少與何柱國約會，只強調每次約會都是一大班朋友聚會。
慈善家何伯長孫何柱國與亞姐前冠軍羅麗莎交往兩年，據最新一期《壹週刊》報道，最近他因與何超瓊（Pansy）秘密交往，所以和羅麗莎關係轉淡，並與移居美加的太太黃敏珊早前同遊巴黎，有講有笑。而何柱國和何超瓊上周五齊齊出席在君悅酒店舉行的周星馳生日派對，二人相隔十分鐘前後腳離場。
其實何柱國和何超瓊交往的消息，在社交圈已流傳了接近半年，今次事件曝光，據知是何超瓊遭社交圈中一位好友出賣，將消息發放給傳媒，該好友向來深得Pansy信任，所以對Pansy的行程瞭如指掌。
Pansy的社交圈好友包括有榮文蔚、雲何婉薇、鄭紹康和前度男友楊其龍等。榮文蔚昨日接受本報電話訪問時說：「嗰日喺君悅都唔係周星馳嘅生日party，我哋去睇世界盃嘅德國對美國之嘛，我哋一大班人都係捧德國隊嘅。」
而昨日下午三時許，Pansy在保鑣護駕下返信德中心上班，見現場有記者等候，Pansy即笑容滿面地停下接受訪問。
Pansy說：「我同何生（何柱國）識咗好多年，係普通朋友關係，外間將事情戲劇化咗，我哋根本大纜都扯唔埋。我都唔明嗰個報道有乜依據可以咁寫。」
問到Pansy與羅麗莎可認識時，她說：「我哋係通過一班朋友識嘅，並唔係由佢（何柱國）介紹認識。」至於父親何鴻燊可有就該事件跟她討論過？Pansy說：「佢都有問過我，我都𢱑晒頭。」
再問Pansy以後與何柱國見面時可會尷尬，她說：「我首先希望傳媒唔好作古仔，件事唔單止影響兩個人，我哋成大班朋友都會俾人跟，我哋係正經人。但我唔會因為呢件事同佢減少約會，根本次次都係成大班人約會，唔通為咗咁搵個朋友傾吓偈都唔得？件事見報之後，我同佢通過電話，大家都覺得係得啖笑。」
以後約會會否更小心？Pansy說：「點小心吖？傳媒要跟實跟到㗎，根本我哋冇嘢，係你哋唔信之嘛！我就唔緊張你哋有啲乜嘢可以跟到嘞。」
Pansy更表示她拍拖的話，一定不會考慮已婚男士，記者問若對方肯為她離婚又如何時，Pansy說：「乜搞到件事咁複雜吖？最好就簡簡單單啦。」Pansy又說：「我去星島做非執行董事，係何生邀請嘅。」
而賭王何鴻燊離開公司時，記者問他可認為女兒與何柱國交往一事是「流料」，何鴻燊竟說：「唔係！」現場記者即時起哄，後來才知何鴻燊的意思是Pansy指整件事不是事實。
記者昨日亦以電話聯絡上何柱國，他說：「我否認咗件事啦，我同Pansy係朋友，賭王咁精明，佢應該知唔係事實啦，《壹週刊》由六月一號開始跟我，𠵱家都影唔到啲乜嘢啦。」
採訪：梁錦雯、陳梅香
攝影：馬啟然