港股噚日反彈162點，收報10518，由於新一批盈富基金（2800）下周二推出，經理人道富需要在市場吸納缺貨嘅官股，如中移動（941）、聯通（762）、地鐵（066）、德昌（179）及利豐（494）等，道富可能今日就要郁手，特別係下午收市前十幾分鐘，個市可能因此而突然急升，其中波幅較大會係地鐵、德昌及利豐，如果要沽地鐵則要好好利用呢個機會。
大市挾完呢一轉後，如無意外淡友將會繼續掟滙豐（005），據聞滙豐都借咗唔少錢畀WorldCom。
唯冠國際（334）話大股東出手增持，因而反彈31％，收報0.67元，全日成交達977萬元。不過，大股東增持數量只有200萬股，唔算積極，做樣多過真係想增持，若大戶繼續出貨，股價難免會再大幅下瀉，想撈底重要等待時機。
騰達智能（691）今日新上市，認購情況只屬一般，公開發售部份獲0.07倍超購，配售部份則獲全數認購，但聽講市場暗盤價唔算太差。此股今次發行1.01億股新股，每股作價0.75元，暗盤價則傳係0.78元，有4％升幅，不過暗盤成交並唔活躍，反映市場對此股睇法只屬一般。黑客話，由於貨源唔算太過分散，大戶有可能乾挾至高位後再出貨，但唔好抱太大期望。
金威（910）發行4.695億份認股權證，每份認股權證作價8.5仙，集資3990萬元，認股權證行使價0.49元，與正股市價差不多。
Cookie話，今次出公司輪主要係因為正股水位有限，所以有大戶想要隻輪嚟炒，不過既然要炒輪，冇理由唔郁埋正股。
阿 虎