講起中山，可能大家都會諗起浸溫泉或者樓盤廣告，不過除此之外，其實去中山重可以玩餐飽，皆因當中有個「泉林山莊」度假區，內裏設有各式各樣新奇刺激玩意多達五十幾種，例如坐坦克、滑冰梯，要一日玩晒都唔係咁易。今日就同大家重點出擊，推介幾個必玩項目！
記者：劉耀 攝影：陳智 Model：Cathy
＊陸地篇＊
一般的遊樂場都只係坐吓碰碰車、觀光車，但「泉林山莊」內都是大型的坦克車、裝甲車，還設有軍事博覽中心，展出多款軍事設備，而且操作人員全部都是退役的解放軍，真係唔講得笑！其中最精采莫過於由黃埔軍校遷移過來的坦克車，唔好以為此坦克車只係眼看手勿動，其實佢絕對行得又走得，速度高兼且非常靈活，遊客更可以一嘗坐坦克車的滋味，感受一下坐坦克車上山下海的軍人Feel。
話明軍事博覽中心當然唔會淨係得架坦克車壓場，同場亦有裝甲車及數座炮台坐鎮，全部都係真材實料，當中幾款炮台更是現役中國炮艦仍然使用的型號，而且全部仍然可以行走及發射炮彈。想一嘗軍人滋味發射炮彈？當然冇問題，不過就盛惠每次?100，等你可以過足軍人癮。
參觀軍事博覽中心 ?5
坐坦克車 ?25
發射炮彈 ?100
若果坐完坦克車都覺得重未夠喉，不妨去軍事博覽中心隔鄰的四驅車場，繼續風馳電掣一番。場內所有四驅車都由澳門入口，架架都有氣有力，而整條四驅車賽道都是以碎石鋪成，依山而建，有上斜有落斜，足夠考驗你駕駛技術兼平衡力，若果同成班朋友一齊砌就更加刺激。
每圈?15
除了速度上的刺激外，自問膽大包天的你，還可試試場內的「荷李活鬼城」，城內有齊中西式各方妖怪，且全部由真人演出，絕非一般機械鬼怪可比擬，隨時都有「突發性」驚嚇。於旅程開始時，更有電視介紹及講解場內注意事項，甚至入場券都是以中國符形式印製，未入場就已經嚇餐死。
山莊面積相當大，若果天時暑熱在場內周圍走，絕對是對體力的大挑戰。或者大家可以到「冰雪世界」歎吓冷氣兼欣賞各式各樣的冰雕展覽。在零下5度的冰雕展內，有北京天壇、桃園結義、冰滑梯、雪滑梯等展出，不過滑梯就要另外收費，每次?2。而場內更有免費大褸供遊客使用，就算由30幾度走入去都冇有怕！
＊空中篇＊
喺陸地玩咗咁耐，係時候試上半空玩吓喇！雖然「泉林山莊」並冇BungeeJump玩，不過大家亦可一嘗在天空飛翔嘅滋味，而「空中飛人」就可以滿足你嘅願望，全程以兩條安全帶緊緊繫在釦上，安全程度絕對可以放心，由一個山頭飛過對面山頭，以10秒鐘時間滑行約190米長的距離，順道更可飽覽附近的美麗山色，呼吸吓清新嘅空氣。
每次?15
若果嫌空中飛人唔夠刺激，想感受一下離心力同彈跳力，咁就一定要試吓「霹靂小飛人」。玩法就係先用安全帶綁住你，兩邊用上巨型大橡筋，之後再慢慢吊高，跟住工作人員就會扯住你對腳，之後你就可以彈到上2、3樓咁高，接住重會有幾吓餘彈。嗰種離心力就真係要試過先識驚，絕對啱晒鍾意刺激嘅朋友。
收費：?10(約5分鐘)
要玩空中遊戲，未必吓吓都要飛呀、彈呀咁嘅，其實想溫文爾雅啲都一樣有辦法，大家可以坐吓「空中單車」，兩個人慢慢喺架空軌道上踩吓單車，都相當浪慢寫意。不過由於莊內地方實在太大，條單車軌道不能繞場一周，若果大家想利用踩單車嚟睇晒周圍嘅風景，就可能會覺得有啲唔夠喉。
每次?5
＊美食．住宿＊
其實山莊內重有好多好玩的地方，例如滑草場、泳池或纜車等，要一日玩晒都真係冇乜可能，所以莊內設有度假村，等遊客可以喺度瞓番晚，慢慢玩。而度假屋全部以House形式建築，充滿外國Feel，收費相當大眾化，一屋二人每晚只需?200，設施亦一應俱全，而山莊內亦設有快餐廳、中餐廳，開放時間由早上9:00至晚上7:00，卡拉OK則為晚上7:00至凌晨1:00。
地址：中山市三鄉鎮南龍村
電話：(760)6688369
開放時間：早上9:00至晚上6:00
交通：從香港乘船到珠海九洲港，票價$150，需時約70分鐘；到九洲港後再轉乘的士，約100，需時約30分鐘。