行內傳咗好耐，塗鴉家「交氏」七月來港，同香港Fans搞簽名會或展覽之類活動。得波鞋占打電話嚟報料，證實「交氏」果然喺七月十日來港，為銅鑼灣間新開女裝潮流店LABINNAH祝賀，波鞋占連邀請卡都搵到返嚟，認真犀利。
「交氏」擅長畫交叉眼作品，成名經過係周街搵宣傳海報嚟加工，畫隻交叉眼上去，即刻有畫龍點睛效果，海報即刻升價十倍。出身於紐約Brooklyn，唔少時下塗鴉偶像都出身於嗰度；即係同利時專出店長，月餅場專出水貨佬一樣，屬地區文化。
可能「交氏」外形係咁多個外國塗鴉家中最斯文靚仔，所以東南亞特別多Fans。日本、香港Fans最現實，唔靚仔唔愛，預計「交氏」嚟到香港，又被成班少女圍住大叫。
聽聞「交氏」同教父P分屬老友，今次「交氏」來港都係由教父P做中間人介紹，相信到時喺銅鑼灣行街好容易碰見佢哋，記得攞簽名喎。
主持人：大食Jack
八卦熱報：