超媒體老闆原來係息影藝員黃敏儀，佢話無拍戲好耐，之後做過保險經紀，3年幾前成立超媒體，而家籌備緊中港巴士巡迴推介。進軍商界嘅黃敏儀，可能唔係太習慣面對鏡頭，影相期間大叫攝記唔好影咁近。
紅磡國際都會嘅酒店改名為都會軒，明日開業，今日就請傳媒睇吓先，重會講講酒店未來業務發展，不過和黃同日就請睇黃埔雅苑示範單位，變成「自己打對台」。
地產代理呢一行，競爭激烈，鬥心非常重要。好似利記咁，早前搞個新界區營業額鬥多比賽，加強員工奮鬥心，日前喺聯歡會上頒獎，由荃灣麗城花園分行包辦個人同團隊獎。團隊獎由陳潤琪一組取得，佣金290萬元；佢嘅下屬蔡詠玲就攞咗1至5月最高營業額個人獎，佣金60萬元。
今個禮拜五到禮拜日，灣仔華潤大廈舉行「中國房地產博覽2002」，除樓盤展銷，重設有好多室內設計、環保、智能家居、估價等攤位。大會重請到歌星到場表演，著名風水師教人買風水樓，個別樓盤更推出特惠單位即場促銷，入場人士可以參加抽獎，有機會攞到10萬蚊家具禮券。
蘭西