喺世盃決賽周展開前被外界看淡奪標機會嘅德國隊，目前雖已手執半邊盃耳，但係佢哋將會有主將波勒喺決賽停賽；不過投注咗佢哋奪標準備收錢嘅人士，都未使太過悲觀嘅！
事實上，德國隊缺少咗波勒嘅瞻前顧後，實力肯定大打折扣，不過睇番近幾屆打入世界盃決賽嘅隊伍，有主將喺準決賽領牌而要喺決賽停賽嘅球隊，又唔算係太過處於劣勢喎。好似九○年咁，阿根廷當時有四名主力停賽，當中包括肯尼基亞呢位主力射手，結果阿根廷只係僅輸一個十二碼畀西德而落敗；四年之後嘅意大利，又有後防大將哥斯達古達停賽，結果都可以同巴西打成○比○；到九八年，法國亦有白蘭斯呢位晉級功臣停賽，但那次法國就大勝巴西三比○，捧走錦標。
以呢個走勢嚟睇，有主力停賽嘅球隊，喺最後決賽表現唔會太輸蝕之外，呢個弱勢亦好似逐漸變成「優勢」咁。所以若德國因為波勒停賽，而喺決賽有較好分頭的話，就更加值博。 文：華度